شعارات بايركس (شعر حلمنتيشي)

لي إيــدينا بنرفع *** والعازب كلو بيسمع
نفوسنا كتير مشتاقة *** للراعي دوام نتضرع
شعارنا عريس متواضع *** ياخي ياقدر اسمع أجمع
نحن البايرات في لهفة *** والعمر ولي وودع
نحن مساكين ياجماعة *** وللجنة دوام نتطلع
لو واحد قام وأتقدم *** في لحظة نلبي ونسمع
***
بلاش عربية خصوصي *** مالو الكداري دا هسع
بلاش من شبكة وشيلة *** بي أبسط حاجة بنقنع
البيت ماشرط عمارة *** دي مظاهر ساكت تخدع
لي جنة نضيرة نحول *** البيت الخرب البجمع
ما شرط تجيب تلاجة *** كفاية الزير البنقع
***
ما دايرين كبدة وشية *** بي ويكة تقيلة بنشبع
ما أصلو شبابنا الودع *** ما ممكن تاني بيرجع
أحلامنا الكانت بدري *** ما عادت تاني بتنفع
دايرين الشاب الأغبش *** حتى لو فقران ومقطع
لانو الفيهو الفايدة *** ليهو دوام نتطلع
حياة السترة أملنا *** انشاء الله ربنا يجمع
يحن الله علينا *** ونشيل أيدينا ونرفع
***
للرب شكوانا بنرفع *** والباير كله بيسمع
في دربك ياما جرينا *** والعين الساهرة بتدمع
كم مرة ايدينا اتمدت *** والرد الجارح اقنع
احلامكم والله غريبة *** وللعين بتزغلل وتذلع
طلباتكم لينا تحير *** جايين تتواضعوا هسع
ما جينا زمان شن قلتو *** يافقير يامقطع أرجع
***
ما عندك حق السفة *** لابس دمور ومرقع
دايرين العندو مصانع *** لو كان لي غيروا بيركع
ما جينا زمان شن قلتو *** يافقير يا مقطع أرجع
في جيوبك ساكنة عناكب *** لو كان باعوك ما بتنفع
دايرين العندو الفلة *** لو كان حنكوش ومدلع
ما جينا زمان شن قلتو *** يا فقير يا مقطع أرجع
***
لو ماشي لآخر الدنيا *** تركب رجليك تتبرطع
دايرين العندو البنز *** لو يبقى عجوزاً أصلع
ما جينا زمان شن قلتو *** يافقير يامقطع ارجع
يا البيتك مبني زبالة *** ومن غير فيضان يتزعزع
دايرين العندو الفيلا *** لو كان صغير بيرضع
ما جينا زمان شن قلتو *** يا فقير يامقطع أرجع
***
وموكيتاً فخماً فاخر *** ونجفا بالدر مرصع
والكندشة فريون ضاربة *** وثلاجة فريزر تجمع
بي فيديو كاسيت وأتاري *** نتسلى لو وكتنا نضيع
ما جينا زمان شن قلتو *** يافقير يامقطع أرجع
***
دايرين زنقيل ومقندل *** لو كان تمساحا يبلع
والعملة الحرة ضروري *** والمهر دولارا يدفع
وبشرط الشيلة العامرة *** والكرسي الجابر يلمع
وذهباً مختوم وأساور *** مليانة الإيد للأصبع
وضروري الحفلة بوردي *** والكابلي اللحنو موقع
ونقضي عسل في أوروبا *** ونطوف العالم أجمع
بي لندن وروما وموسكو *** وفينا المدن الأربع
نلبس في الكاسي العاري *** ولو طلعت موضة بنتبع
وناكل فاكهة طازجة *** وبالخير نتمتع ونشبع
أفلامكم والله عجيبة *** خلونا نحمض ونطبع
ماجينا زمان شن قلتو *** يامبهدل أوعك تطمع
***
مد رجليك قدر لحافك *** وشوف ليك طورية وأزرع
لي مين تتقدم انت *** يا قرد ياقبيح يا مبرقع
كيفن بتحب يا أغبش *** من غير شاكوش تتفرقع
لو كان بنحب الزيك *** ما أخير الموت الأسرع
لو مت وفاتك تفرح *** ولو عشت حياتك تفجع
ولو تبقي ضراعي الأيمن *** في لحظة بنقطع ونجدع
***
ما قلنا الدنيا دي فانية *** وآمالنا مظاهر تخدع
اختاروا العندو ديانة *** الديمة وشو بيلمع
قلتولنا خلاص انتظرو *** الحور في الجنة بتنفع
الليلة قطركم صفر *** والعمر ولى ودع
عجزتو قعدتو تقولوا *** واشبابنا الأغبش أجدع
ماجينا زمان شن قلتو *** يافقير يا مقطع أرجع
***
ما جينا زمان ليه كنتو *** جاهلننا زي الشفع
ما خلاص الليلة وقعتوا *** من قد القفة الأوسع
والليلة قطركم دور *** وقعتوا في وش المدفع
رافعين الراية البيضاء *** لكن هيهات ما بتنفع
رافعين لعرس جماعي *** وفي العشرة ألف ما بنطمع
وهنياً ليكم كبدة وشية *** بعد الأضراس تتخلع

--------------------------------------------------------------------------------

طبعا ابيات الشعر رائعةو جميلة جدا
وعبر عن معاناة الشباب في الزواج ومغالاة الفتيات في الطلبات ،ولكن صدقني هذه ليست هي المشكلة الحقيقية ، فالمشكلة الحقيقية تكمن في عدم وجود الصدق والنية الطيبة عند التقدم في الزواج ، فحقا لو شعر اهل الفتاة بمصداقيه العريس اكيد هيكون الترحيب جاد ولن يجد اي صعوبه في اتمام الزواج .
واحب ان اضيف ان الرسول (ص) قال من لايستطع منكم الباءة فلايتزوج ..... وهنا كانت الاشارة الي ضرورة توفير اساسيات الزواج فمن لايستطع من تحقيق اساسيات الزواج كيف يقبل به عريسا ؟؟؟؟؟
واكرر شكري وتحياتي